Bases reguladoras e convocatoria, en réxime de concorrencia non competitiva, do proxecto “+emprega nos concellos” 2026 para financiar contratos formativos

BASES REGULADORAS E CONVOCATORIA, EN RÉXIME DE CONCORRENCIA NON COMPETITIVA, DO PROXECTO “+EMPREGA NOS CONCELLOS” 2026 PARA FINANCIAR CONTRATOS FORMATIVOS A Deputación de Pontevedra, a través do Servizo de Promoción de Emprego e Desenvolvemento Local, tendo en conta que o da mocidade é un dos colectivos de atención prioritaria, segundo o establecido na Lei 3/2023, de 28 de febreiro, de emprego, e debido á súa taxa de desemprego, aposta pola realización de accións e pola execución de programas de fomento do emprego xuvenil para evitar a fuga de talento fóra da nosa provincia e de Galicia. Ademais, a Deputación de Pontevedra recoñece a importancia do desenvolvemento económico e o impulso ao emprego, que radica tanto no impacto directo na calidade de vida das persoas coma na construción dunha sociedade máis equitativa e próspera. Así, o programa “+Emprega” ten como principal obxectivo promover a inclusión social e o desenvolvemento económico e social da provincia a través da creación de emprego de calidade e do fomento da empregabilidade da cidadanía, e dálles continuidade aos programas de fomento da empregabilidade desenvolvidos pola Deputación de Pontevedra durante os dous anos anteriores. Os seus eixes de actuación son os seguintes: Eixe 1: Impulso ao emprego. • Eixe 2: Fomento do emprego inclusivo. Dentro do primeiro inclúese, entre outros, o proxecto “+Emprega nos concellos”, que ten por obxecto proporcionarlles ás mozas e aos mozos desempregados e, en xeral, ás persoas desempregadas da provincia unha primeira experiencia profesional a través dun contrato de traballo. Esta permitiralles adquirir competencias técnicas, sociais e profesionais, así como habilidades transversais, entre elas a empatía, a creatividade, a capacidade de liderado e a adaptación ao contorno laboral, ademais de favorecer a aplicación práctica da súa recente titulación. Polo tanto, a través deste proxecto, a Deputación pretende romper a barreira que teñen as mozas e os mozos para acceder a un emprego cualificado por falta de experiencia e aposta polo seu desenvolvemento profesional. O mencionado proxecto desenvolverase en dúas fases: a) Primeira: selección das entidades colaboradoras e determinación do nivel de estudos para obter a práctica profesional adecuada ao devandito nivel baixo a modalidade de contrato formativo. b) Segunda: selección das persoas beneficiarias dos contratos formativos por parte das entidades colaboradoras, tal e como se dispón nas bases reguladoras e na convocatoria. c) “+Emprega nos concellos” desenvolverase en consonancia co establecido no Real decreto lei 32/2021, de 28 de decembro, de medidas urxentes para a reforma laboral, a garantía da estabilidade no emprego e a transformación do mercado de traballo, que regula, entre outras cuestións, as condicións do contrato formativo para obter unha práctica profesional adecuada ao nivel de estudos, así como no posterior Real decreto 1065/2025, de 26 de novembro, polo que se desenvolve o réxime do contrato formativo, previsto no artigo 11 do texto refundido da Lei do estatuto dos traballadores, aprobado polo Real decreto lexislativo 2/2015, de 23 de outubro. De acordo cos principios informadores da Unión Europea e co de autonomía provincial, recollido nos artigos 137 e 141 da Constitución, correspóndelles ás deputacións a decisión de definir as prioridades na execución das distintas liñas de actuación en relación co fomento do desenvolvemento económico e social no territorio provincial, adecuándoas ás especificidades e necesidades da poboación, dentro dos límites establecidos para o debido control e vixilancia do uso dos recursos públicos. Por todo isto, a Deputación de Pontevedra, no uso das competencias e atribucións que se lle asignan na vixente Lei 7/1985, de 2 de abril, reguladora das bases do réxime local (LRBRL), establece as bases que regulan as condicións para seleccionar as entidades colaboradoras, determinar o nivel de estudos para o desempeño dunha actividade laboral destinada a adquirir unha práctica profesional adecuada aos correspondentes niveis de estudos (de aquí en diante, contrato formativo), publicar e resolver o procedemento, así como as condicións de execución que teñen que cumprir as entidades colaboradoras, a propia Deputación e as persoas contratadas. Primeira. Obxecto e financiamento 1. Constitúe o obxecto destas bases regular as condicións polas que se rexerá a convocatoria pública para seleccionar os concellos como entidades colaboradoras e determinar o nivel de estudos dos 129 postos de traballo que se van ocupar baixo a modalidade de contrato formativo, así como o desenvolvemento destas bases, que establecerán as relacións entre a Deputación de Pontevedra e as entidades colaboradoras. As contratacións laborais baixo a modalidade de contrato formativo resultantes realizaranse entre as entidades colaboradoras e as persoas tituladas universitarias e de formación profesional de ciclos medios e superiores co fin de que poidan adquirir a práctica profesional adecuada ao nivel de estudos cursados e facilitarlles a súa inserción no mercado laboral. A través desta subvención financiarase unha parte do custo laboral total dun contrato formativo, que deberá ser por un período máximo dun (1) ano a tempo completo. A distribución destas contratacións laborais realízase entre os concellos de menos de 50.000 habitantes, como entidades colaboradoras, de acordo co cadro que se mostra a continuación, no que resultan un total de 129 contratos formativos (datos de poboación publicados polo Instituto Galego de Estatística, IGE, a 1 de xaneiro de 2025): Núm. de habitantes Núm. de contratos Núm. de concellos Total Ata 3.000 1 11 11 De 3.001 a 10.000 2 26 52 De 10.001 a 50.000 3 22 66 TOTAL 129 2. O importe total destinado a este proxecto é de dous millóns cento sesenta e sete mil douscentos euros (2.167.200,00 €), que se financiarán con cargo á aplicación 240.2410.489.00 do Orzamento da Deputación de Pontevedra do exercicio de 2027. Esta convocatoria tramítase como expediente anticipado de gasto, condicionada á existencia de crédito adecuado e suficiente nos orzamentos da institución provincial para o mencionado exercicio. Segunda. Contía da subvención e período subvencionable 1. As contías máximas das subvencións que se concederán por cada contrato formativo segundo o nivel estudos serán as seguintes: Nivel de estudos Importe máximo mensual Importe máximo anual da subvención Licenciatura, grao ou diplomatura 1.400,00 €/mes 16.800,00 € Ciclo superior de formación profesional 1.200,00 €/mes 14.400,00 € Ciclo medio de formación profesional 1.000,00 €/mes 12.000,00 € 2. A retribución polo tempo de traballo efectivo será a fixada no convenio colectivo aplicable a estes contratos ou, no seu defecto, a do grupo profesional e nivel retributivo correspondente ás funcións desempeñadas. O salario non poderá ser inferior ao 70 % para o grupo profesional e nivel retributivo correspondente ao nivel de estudos e funcións desempeñadas e, en ningún caso, inferior ao salario mínimo interprofesional (SMI) vixente. As entidades colaboradoras deberán complementar a cantidade que sexa necesaria ata acadar os salarios antes indicados, asumindo o custo total da Seguridade Social e os demais conceptos salariais que poidan derivar da relación contractual con cada persoa traballadora baixo a modalidade de contrato formativo. 3. O período subvencionable dos contratos formativos será dun máximo dun (1) ano e deberán comezar o 15 de xaneiro de 2027 ou na data establecida no acordo de concesión. 4. As subvencións previstas nesta convocatoria serán compatibles con outras subvencións, axudas, ingresos ou recursos para a mesma finalidade, procedentes de calquera outra Administración ou ente público ou privado, nacional, da Unión Europea ou de organismos internacionais, pero en ningún caso a contía total das subvencións poderá superar os custos totais da contratación. Para tal efecto, as entidades colaboradoras deberán comunicarlle á Deputación de Pontevedra se se obtiveron outras subvencións ou axudas para a mesma finalidade, tanto no momento da presentación da solicitude coma durante a tramitación do procedemento. Terceira. Entidades colaboradoras Poderán ser entidades colaboradoras das axudas ou subvencións previstas neste proxecto os concellos da provincia de Pontevedra de menos de 50.000 habitantes que dispoñan da capacidade técnica e de xestión suficiente para executar os correspondentes proxectos e non incorran nas circunstancias establecidas no artigo 13.2 da Lei 38/2003, de 17 de novembro, xeral de subvencións (LXS). As entidades colaboradoras utilizarán a modalidade de contrato formativo e deberán cumprir todos os requisitos establecidos na normativa aplicable a esta tipoloxía de contrato. Así mesmo, estas terán como compensación, por colaborar coa Deputación na consecución dos obxectivos deste proxecto, o aproveitamento do rendemento do traballo das persoas que se contraten. Cuarta. Requisitos das persoas beneficiarias e dos contratos formativos 1. Os contratos formativos poderán concertarse con aquelas persoas que reúnan os seguintes requisitos: a) Estar en posesión dunha titulación universitaria ou dun título de grao medio ou superior de formación profesional ou de títulos oficialmente recoñecidos como equivalentes, de acordo coas leis reguladoras do sistema educativo vixente, que habiliten para o exercicio profesional. b) Estar inscritas como demandantes ou en mellora de emprego no Servizo Público de Emprego. c) Estar empadroadas nalgún dos concellos da provincia de Pontevedra antes da data de publicación da propia convocatoria no Boletín Oficial da Provincia de Pontevedra (BOPPO). d) No momento da contratación non deberán transcorrer máis de tres (3) anos desde a terminación dos correspondentes estudos ou máis de cinco (5) anos en caso de que o contrato se asine cunha persoa con discapacidade. No caso de persoas que realizasen os estudos no estranxeiro, o devandito cómputo efectuarase desde a data do recoñecemento ou homologación do título en España. e) Non posuír experiencia profesional nin formativa na mesma actividade dentro da mesma entidade por un tempo superior a tres (3) meses; non se computarán, para estes efectos, os períodos de formación ou prácticas que formen parte do currículo esixido para obter a titulación que habilita esta contratación. f) Non ser contratada na mesma ou distinta entidade por tempo superior á duración máxima para este tipo de contratos en virtude da mesma titulación. g) Non estar contratadas en prácticas no momento da selección nalgún dos programas que contemplen contratos en prácticas ou formativos da Deputación de Pontevedra. 2. Así mesmo, as entidades deberán cumprir os requisitos esixidos no punto primeiro do artigo 1 do mencionado Real Decreto lei 32/2021, polo que se modifica o Texto refundido da Lei do Estatuto dos Traballadores, aprobado polo Real decreto lexislativo 2/2015, de 23 de outubro, no que se modifica o artigo 11, e os artigos 21 e 22 do Real decreto 1065/2025, de 26 de novembro, polo que se desenvolve o réxime do contrato formativo, previsto no artigo 11 do texto refundido da Lei do estatuto dos traballadores. Quinta. Presentación de solicitudes As solicitudes presentaranse obrigatoriamente por medios electrónicos a través do formulario normalizado dispoñible na Sede electrónica ( https://sede.depo.gal ). Para a presentación das solicitudes a Sede electrónica da Deputación de Pontevedra admite os certificados electrónicos do sistema Cl@ve, que contempla a utilización de sistemas de identificación baseados en claves concertadas (sistemas de usuario e contrasinal) e certificados electrónicos (incluído o DNIe). A presentación da solicitude implica o coñecemento e a aceptación incondicional destas bases reguladoras. Non axustarse aos termos da convocatoria, así como ocultar ou alterar datos ou calquera outra manipulación da información, será causa de desestimación da solicitude, sen prexuízo do disposto nos artigos 54 a 56 da Lei 9/2007, de 13 de xuño, de subvencións de Galicia (LSG). Sexta. Prazo de presentación de solicitudes O prazo de presentación de solicitudes será de quince (15) días hábiles, contados a partir do día seguinte ao da publicación desta convocatoria e do extracto no BOPPO. Se o último día fose inhábil, este prazo prorrogarase ata o primeiro día hábil seguinte. Sétima. Contido da solicitude de iniciación do procedemento As entidades solicitantes deberán completar no modelo de solicitude o nivel de estudos requirido. Este modelo inclúe a declaración responsable, na que se detallará o seguinte: a) O cumprimento dos requisitos establecidos para obter a condición de entidade colaboradora e, especificamente, de estar ao día no cumprimento das obrigas tributarias coa Axencia Estatal de Administración Tributaria (AEAT) e coa Axencia Tributaria de Galicia (ATRIGA), así como ao corrente do pagamento coa Seguridade Social e non ter débedas coa Deputación de Pontevedra. b) O conxunto de todas as solicitudes efectuadas ou concedidas para a mesma finalidade das distintas administracións públicas competentes. c) A veracidade da titularidade da conta bancaria da entidade solicitante na que se deba efectuar o pagamento da subvención. d) Que os contratos formativos se destinan a servizos de competencia municipal e que cumpren os requisitos esixidos nestas bases en canto á súa capacidade técnica e de xestión. e) Que se comprometen a cumprir os requisitos esixidos nas bases e na demais normativa de aplicación durante a selección das persoas e o período de vixencia do contrato. Ademais, deberán informar a Deputación de Pontevedra de calquera variación das circunstancias. f) Que coas devanditas contratacións non se están a cubrir postos de traballo de natureza estrutural, estean ou non dentro das relacións de postos de traballo, nos cadros de persoal ou noutra forma de organización de recursos humanos, contemplados nas entidades locais e dotados orzamentariamente. g) Que o posto de traballo e a titulación para contratar non fose subvencionado noutras convocatorias do ano 2025 da Deputación de Pontevedra ou doutras entidades de igual ou semellantes características a esta convocatoria. Oitava. Documentación Xunto co formulario de solicitude, as entidades solicitantes deberán presentar a seguinte documentación: • Unha certificación da Secretaría da entidade solicitante, segundo o modelo normalizado que se publica como anexo II, na que conste: • O compromiso de financiamento para custear a parte non subvencionada pola Deputación. • As retribucións salariais brutas das persoas traballadoras que se contraten a través desta convocatoria, en cómputo mensual (complementos e pagas extra incluídas), e as cotizacións empresariais á Seguridade Social, con referencia á publicación oficial do convenio colectivo aplicable e que inclúa as táboas salariais vixentes no momento da solicitude. De non existir convenio farase constar no certificado esta circunstancia e deberase especificar expresamente que as retribucións se fixarán de conformidade coa normativa laboral vixente, que deberá especificarse, ademais de incluír as correspondentes táboas salariais. En caso de ter que achegar documentación complementaria, esta presentarase por medios electrónicos. As persoas interesadas responsabilizaranse da veracidade dos documentos entregados; excepcionalmente, a Administración poderá requirir o documento orixinal para cotexalo coa copia electrónica presentada. Se algunha das persoas interesadas presentase a documentación complementaria presencialmente, requiriráselle que a emende a través da súa presentación electrónica. Para estes efectos, considerarase como data de presentación aquela na que se realice a emenda. Novena. Trámites administrativos posteriores á presentación de solicitudes e emenda destas Todos os trámites administrativos que as persoas interesadas deban realizar durante a tramitación deste procedemento faranse por medios electrónicos a través do modelo “2887054 Trámites administrativos xenéricos distintos da solicitude”, dispoñible en https://sede.depo.gal . A Sede electrónica ten dispoñibles unha serie de modelos xenéricos que as persoas interesadas poden utilizar para realizar as xestións máis habituais durante a tramitación administrativa (representación, emenda da solicitude, alegacións, renuncia ou recursos, entre outros). Estes modelos son comúns para os distintos procedementos e poderán empregarse sempre que a normativa reguladora do procedemento concreto para o que se vaian utilizar non estableza outros modelos específicos. Os modelos xenéricos poderán descargarse para anexalos a unha solicitude ou para realizar trámites sobre outros expedientes e presentalos electronicamente. No formulario deberá indicarse, no seu caso, o procedemento para o que se efectúa o trámite. Os modelos están dispoñibles en https://sede.depo.gal/web/public/dynamic/catalogo/tramitesxenericos . Décima. Notificacións As notificacións de resolucións e actos administrativos practicaranse só por medios electrónicos, nos termos previstos na normativa reguladora do procedemento administrativo común. Estas practicaranse a través da Dirección Electrónica Habilitada única, sistema accesible desde a Sede electrónica da Deputación de Pontevedra ( https://sede.depo.gal ) ou a través de https://dehu.redsara.es/. As notificacións entenderanse practicadas no momento no que se acceda ao seu contido e rexeitadas cando transcorresen dez (10) días naturais desde a posta á disposición da notificación sen que se acceda a este. O sistema remitiralles ás persoas interesadas avisos da posta á disposición das notificacións á conta de correo electrónico indicada na solicitude. Estes avisos non terán, en ningún caso, efectos de notificación realizada e a súa falta non impedirá que esta se considere plenamente válida. Se o envío da notificación electrónica non fose posible por problemas técnicos, a Deputación de Pontevedra practicará a notificación polos medios previstos na normativa reguladora do procedemento administrativo común. A notificación do acordo de concesión de subvencións realizarase mediante publicación no BOPPO, de acordo co disposto no artigo 45 da Lei 39/2015, de 1 de outubro, do procedemento administrativo común das administracións públicas (LPACAP). Décimo primeira. Resolución O procedemento de selección das entidades colaboradoras tramitarase en réxime de concorrencia non competitiva, de acordo co previsto nos artigos 12 a 15 da LXS, no artigo 19.2 da LSG e no establecido nestas bases. O órgano instrutor deste procedemento de selección será a Xefatura do Servizo de Promoción de Emprego e Desenvolvemento Local da Deputación de Pontevedra, que realizará de oficio cantas actuacións estime necesarias para determinar, coñecer e comprobar os datos en virtude dos cales deberá formularse a proposta de resolución, de conformidade co previsto no artigo 21 da LSG. A Xefatura do Servizo de Promoción de Emprego, unha vez comprobados os expedientes e determinada a relación de concellos que acadarán a condición de entidades colaboradoras, na que se especificarán o número de contratos, o nivel de estudos solicitado, a duración e a data límite de inicio e a contía da subvención, elevará a proposta de acordo e someteraa ao órgano competente, logo do informe de fiscalización emitido pola Intervención. Nesta proposta farase tamén mención ás entidades que non cumpran as condicións e á motivación da súa exclusión. A resolución do procedemento correspóndelle á Xunta de Goberno provincial e notificaráselles ás persoas interesadas de acordo co establecido nos artigos 40 e 41 da LPACAP. O prazo máximo para resolver e notificarlles ás persoas interesadas a resolución do procedemento é de seis (6) meses, contados a partir da publicación desta convocatoria. Transcorrido este prazo sen notificárselles a resolución, a solicitude de concesión da subvención entenderase como desestimada por silencio administrativo. O acordo de concesión de subvencións publicarase no BOPPO e producirá os efectos da notificación, de acordo co disposto no artigo 45 da LPACAP. Esta resolución ponlle fin á vía administrativa. Contra ela, as persoas interesadas poderán interpoñer un recurso potestativo de reposición ante o mesmo órgano que a ditase no prazo dun (1) mes, a partir do día seguinte ao desta notificación, de acordo co disposto nos artigos 112 e 124 da LPACAP, ou ben, directamente, un recurso contencioso-administrativo ante o Xulgado do Contencioso-Administrativo de Pontevedra, no prazo de dous (2) meses, segundo o establecido no artigo 46 da Lei 29/1998, de 13 de xullo, reguladora da xurisdición contencioso-administrativa. Todo iso sen prexuízo de que se poida interpoñer calquera outro recurso que se estime conveniente. As subvencións concedidas entenderanse aceptadas se as persoas beneficiarias non se opoñen nin as rexeitan expresamente no prazo de dez (10) días hábiles, contados desde a súa notificación. Toda alteración das condicións que se tiveron en conta para a selección dos concellos como entidades colaboradoras e, en todo caso, a obtención concorrente de subvencións ou axudas outorgadas para a mesma finalidade por outras administracións ou entes públicos ou privados, estatais, da Unión Europea ou internacionais, poderá dar lugar á modificación do acordo de concesión. Décimo segunda. Publicidade das subvencións concedidas Estas bases reguladoras publicaranse no BOPPO e na Sede electrónica da Deputación de Pontevedra ( https://sede.depo.gal ). Ademais, a institución provincial publicará a concesión das subvencións no BOPPO e na súa páxina web. Así mesmo, as entidades colaboradoras deberán realizar unha adecuada publicidade do carácter público do financiamento recibido. A este respecto, as medidas de difusión consistirán, polo menos, en que no lugar onde se realice o servizo deberá figurar, de forma visible, un cartel informativo no que constará o cofinanciamento por parte da Deputación de Pontevedra. Igualmente, na documentación administrativa deberase facer mención ao financiamento da institución provincial. Décimo terceira. Requisitos e criterios de selección das persoas beneficiarias dos contratos formativos 1. A selección realizaraa a entidade local de acordo coas normas de selección de persoal que lle sexan de aplicación, que será a responsable última de verificar que as e os candidatos cumpren todos os requisitos establecidos no momento da alta na Seguridade Social. Na selección das persoas beneficiarias dos contratos formativos aplicaranse os principios constitucionais de igualdade, mérito e capacidade, así como os establecidos no Real decreto lexislativo 5/2015, de 30 de outubro, polo que se aproba o Texto refundido da Lei do estatuto básico do empregado público, de publicidade das convocatorias e das súas bases, de transparencia, imparcialidade e profesionalidade dos membros dos órganos da selección, da independencia e discrecionalidade técnica na actuación, da adecuación entre o contido dos procesos selectivos e as funcións ou tarefas que se van desenvolver, da axilidade, sen prexuízo da obxectividade, nos procesos de selección e dos demais establecidos na normativa vixente aplicable. Así mesmo, para levar a cabo a selección, o concello nomeará o tribunal cualificador, cuxa composición deberá adecuarse aos principios que regulan a constitución e o funcionamento dos órganos de selección. 2. En caso de que a selección das persoas traballadoras non se realice mediante convocatoria pública, o perfil dos postos de traballo e os criterios de selección recollidos no anexo I deberán publicarse na Sede electrónica ou na páxina web do concello antes da presentación da oferta na oficina do Servizo Público de Emprego do domicilio da entidade colaboradora. Deberase presentar unha por nivel de estudos e grupo profesional dentro de cada ocupación, de acordo cos seguintes principios xerais: a) Non poderá conter elementos que poidan servir de base para calquera tipo de discriminación que non responda aos criterios establecidos nestas bases. b) En ningún caso poderá incluírse nin admitirse como mérito a experiencia laboral. c) Expresará que as persoas deben estar inscritas no Servizo Público de Emprego como demandantes ou en mellora de emprego, así como os requisitos esixidos para formalizar un contrato formativo. O ámbito de busca de emprego de cada concello non poderá superar o nivel provincial. 3. Co obxecto de garantir o dereito de igualdade de oportunidades e de trato no acceso ao mercado laboral das persoas que, por circunstancias físicas ou psíquicas, teñan dificultades de empregabilidade, recoméndase que as entidades colaboradoras lles faciliten de forma activa o acceso a estes contratos formativos a persoas con discapacidade, reservando os perfís que consideren oportunos e valorando de forma positiva esta circunstancia na convocatoria pública. 4. A selección deberá efectuarse antes da data de inicio dos contratos establecida no apartado 3 da base segunda desta convocatoria. Décimo cuarta. Persoas beneficiarias 1. As persoas seleccionadas de conformidade co procedemento establecido na base anterior serán beneficiarias dun contrato formativo para obter a práctica profesional axeitada ao nivel de estudos a tempo completo pola entidade colaboradora, de acordo coa normativa vixente e nos termos expresados no acordo de concesión. 2. A concesión e o gozo destas axudas non supoñerá, en ningún caso, unha relación contractual ou laboral coa Deputación de Pontevedra. 3. As entidades colaboradoras deberán facilitarlles ás persoas contratadas os elementos persoais e materiais necesarios para levar a cabo o seu traballo. As persoas responsables da entidade colaboradora impartiranlles todas as ordes, os criterios de realización do traballo e as directrices ás persoas traballadoras, ademais de encargarse da calidade técnica das tarefas que estas desenvolvan. 4. Se unha vez iniciado o contrato a persoa seleccionada renunciase, a entidade colaboradora poderá cubrir o posto coa candidata que figure como suplente no correspondente proceso selectivo. De non existiren suplentes, a selección efectuarase seguindo o procedemento previsto na base décimo terceira. En tal situación, tendo en conta que o contrato debe ter unha duración mínima de seis (6) meses e máxima dun (1) ano, dentro desta liña de subvencións, a entidade colaboradora asumirá o custo laboral total que exceda do importe da subvención que corresponda por este contrato formativo dun ano. A devandita substitución deberá producirse no prazo máximo de un (1) mes desde a renuncia, e a entidade deberá comunicalo e entregar a documentación indicada na base décimo sexta no prazo máximo dun mes e medio desde a renuncia. 5. A persoa suplente ou substituta referida no apartado anterior sempre deberá ter o mesmo nivel de estudos e grupo profesional e cubrir o mesmo posto de traballo que a inicialmente seleccionada, de xeito que o plan formativo individual achegado se cumpra na súa totalidade. 6. Excepcionalmente, nos supostos en que a persoa seleccionada renuncie con anterioridade ao inicio do contrato, a entidade colaboradora poderá cubrir o posto, de conformidade co establecido no apartado 4, 5 e a base décimo terceira; sempre e cando se acredite documentalmente mediante escrito da persoa seleccionada ou esta renuncia sexa comunicada nun período inferior a un (1) día hábil á data de inicio, e non resulte posible formalizar o contrato coa persoa suplente dentro dos prazos establecidos na convocatoria, a entidade poderá cubrir o posto conforme ao procedemento indicado anteriormente. Así mesmo, se o proceso selectivo quedase deserto aplicaríase o mesmo criterio cando a entidade colaboradora documente a solicitude inicial de persoas candidatas ao Servizo Público de Emprego ou a publicación da correspondente convocatoria nun prazo máximo de dez (10) días hábiles desde a publicación no BOPPO do acordo de outorgamento da condición de entidade colaboradora. En ambos os dous supostos, a data máxima de inicio do contrato será o 15 de febreiro de 2027. 7. A relación laboral que xurda entre a entidade colaboradora e a persoa traballadora non vinculará a Deputación de Pontevedra. Décimo quinta. Obrigas das entidades colaboradoras 1. As entidades colaboradoras deberán cumprir, ademais das obrigas establecidas na LXS, as seguintes: a) Comezar os contratos o 15 de xaneiro de 2027 ou na data establecida no acordo de concesión. b) Presentar a documentación sinalada no apartado 1 da base décimo sexta nun prazo máximo de quince (15) días hábiles desde a data de inicio do contrato. c) Asignarlle á persoa contratada un posto de traballo adecuado ao nivel de estudos ou de formación obxecto do contrato. d) Aboarlles ás persoas contratadas a retribución correspondente conforme o establecido no apartado 2 da base segunda. e) Someterse ás actuacións de comprobación e control que poida efectuar a Intervención da Deputación de Pontevedra. f) En caso de que xurdan modificacións substantivas que lle afecten á realización da actividade, este feito comunicaráselle ao Servizo de Promoción de Emprego e Desenvolvemento Local no prazo de dez (10) días. g) Poñer á disposición das persoas contratadas todos os medios materiais necesarios para o correcto desenvolvemento das súas funcións e, en particular, os equipos informáticos pertinentes, así como o acceso a internet e un correo electrónico. h) Asignar unha persoa titora que conte coa experiencia e formación axeitadas e que será a responsable do seguimento do itinerario formativo-laboral previsto no plan formativo individual, da supervisión da persoa traballadora e da avaliación da actividade laboral desenvolvida. Así mesmo, a persoa titora poderá designar outras persoas traballadoras da entidade colaboradora que, polas súas competencias profesionais, poidan participar no seguimento do itinerario formativo-laboral. i) Á finalización do contrato para a obtención de práctica profesional a empresa deberalle entregar á persoa traballadora unha certificación sen efectos académicos na que conste a duración das prácticas, o posto de traballo desempeñado e o contido das principais tarefas desenvolvidas. j) Cumprir as demais obrigas establecidas nestas bases e na normativa de aplicación. 2. Polo que respecta á protección de datos de carácter persoal, as entidades colaboradoras están obrigadas a: a) Cumprir a normativa aplicable de protección de datos persoais. b) Tratar os datos coa finalidade exclusiva da xestión da subvención. En ningún caso estes datos poderán ser obxecto dun tratamento distinto ao previsto na convocatoria. Calquera tratamento deles que non se axuste ao disposto nestas bases será responsabilidade exclusiva da entidade colaboradora, que responderá fronte a terceiras persoas das infraccións nas que incorra e fronte á Deputación polos danos e perdas que lles poida causar. Décimo sexta. Xustificación A xustificación da subvención efectuarase en dúas fases, o que lles permitirá ás entidades colaboradoras solicitar tamén o pagamento anticipado ou un único pagamento da subvención ao finalizar o contrato ou os contratos obxecto da subvención. 1. Xustificación de inicio e solicitude de pago anticipado correspondente ao 50 % do importe máximo subvencionado (6 meses). A entidade colaboradora deberá presentar nun prazo máximo de quince (15) días hábiles, contados desde a data de inicio do contrato, a documentación xustificativa obrigatoriamente por medios electrónicos, a través do modelo “2887054 Trámites administrativos xenéricos distintos da solicitude”, dispoñible en https://sede.depo.gal , dirixida ao Servizo de Promoción de Emprego e Desenvolvemento Local: a) Unha certificación da Secretaría do concello no modelo normalizado da Deputación de Pontevedra, no que se indicará: — O cumprimento dos requisitos esixidos nas bases do proxecto no referente á selección do persoal e que as persoas contratadas cumpren os requisitos establecidos na base cuarta e na demais normativa de aplicación para concertar o contrato formativo. — O plan formativo individual, conforme o sinalado no artigo 25 do Real decreto 1065/2025, de 26 de novembro, polo que se desenvolve o réxime do contrato formativo, no que se debe especificar: • O itinerario formativo-laboral, que concrete os contidos da actividade laboral na entidade colaboradora ao longo do contrato, as tarefas que se van realizar, a identificación das persoas contratadas con cargo ao referido programa, o nivel de estudos e a titulación —que deberán ser acordes á actividade que se vaia desenvolver—, as datas de inicio dos contratos, o posto de traballo que ocuparán e a duración do contrato. • A identificación da persoa titora asignada que conte coa experiencia e formación axeitadas e que será a responsable do seguimento do itinerario formativo-laboral previsto no plan formativo individual, da supervisión da persoa traballadora e da avaliación da actividade laboral desenvolvida. • Sistema de titoría e avaliación da actividade laboral desenvolvida. Toda esta documentación quedará á disposición da Deputación de Pontevedra para o seu exame e, se esta o considerase oportuno, os xustificantes correspondentes. b) Informe asinado por persoal funcionario de carreira competente na materia da entidade local ou con habilitación de carácter nacional, no que fará constar os seguintes asuntos: — Que coas devanditas contratacións non se están a cubrir postos de traballo de natureza estrutural, estean ou non dentro das relacións de postos de traballo, cadro de persoal ou outra forma de organización de recursos humanos, contemplados na entidade local e dotados orzamentariamente. — Que os contratos formativos se destinan a servizos de competencia municipal e que cumpren os requisitos esixidos nestas bases en canto á súa capacidade técnica e de xestión. — Que o posto de traballo e titulación que se vai contratar non foi subvencionado noutras convocatorias do ano 2025 da Deputación de Pontevedra ou doutras entidades de igual ou semellantes características ca as desta convocatoria. c) Solicitude, mediante formulario normalizado, do pago anticipado e número de conta bancaria, en caso de que a entidade colaboradora estea interesada en recibir o pago anticipado correspondente ao 50 % do importe máximo subvencionado (6 meses). 2. Xustificación final Unha vez finalizados os contratos formativos, as entidades colaboradoras deberán presentar para a xustificación final, no prazo máximo de dous (2) meses, por medios electrónicos e a través do modelo “2887054 Trámites administrativos xenéricos distintos da solicitude”, dispoñible en https://sede.depo.gal , dirixido ao Servizo de Promoción de Emprego e Desenvolvemento Local da Deputación de Pontevedra, a seguinte documentación: a) O modelo normalizado de memoria final sobre as actividades realizadas e o contido da práctica profesional adquirida polas persoas contratadas. b) Unha certificación da Secretaría do concello na que se acredite que os gastos se realizaron e aplicaron á finalidade subvencionada; esta documentación quedará á disposición da Deputación de Pontevedra para o seu exame e, se o considera oportuno, os xustificantes correspondentes. Nesta certificación deberanse concretar, desagregadas por meses para cada contrato, as cantidades aboadas en concepto de salario e cotización empresarial á Seguridade Social e as cantidades deducidas na liquidación de cotas a ese mesmo organismo (modelo do recibo de liquidación de cotizacións, RLC) en concepto de incapacidade temporal das traballadoras e traballadores contratados baixo a modalidade de contratos formativos con cargo a esta subvención, cuxa contía se deberá excluír do cálculo do gasto total elixible realizado polo concello e que, no seu caso, dará lugar á obriga de reintegro á institución provincial. c) Unha declaración responsable do conxunto de todas as solicitudes efectuadas ou concedidas, para a mesma finalidade, das distintas administracións públicas competentes, e de estar ao día no cumprimento das obrigas tributarias coa AEAT e coa ATRIGA, así como ao corrente do pagamento coa Seguridade Social e de non ter débedas coa Deputación de Pontevedra d) Unha fotografía do cartel informativo e a súa localización. Décimo sétima. Pagamento O pagamento efectuarase por transferencia á conta bancaria indicada pola entidade colaboradora. En caso de que as entidades colaboradoras soliciten o pago anticipado, este poderá realizarse en dous aboamentos: un primeiro do 50 % do importe máximo da subvención coa xustificación de inicio e un segundo do 50 % restante coa xustificación final. Para aquelas entidades colaboradoras que non soliciten o pago anticipado, realizarase un único aboamento correspondente ao importe máximo da subvención (100 %) tras a xustificación final. O importe reducirase proporcionalmente cando o posto de traballo se cubra por un período inferior a un ano ou existan outras circunstancias que minoren os custos totais presentados pola entidade colaboradora. Décimo oitava. Incumprimentos, reintegros e réxime sancionador Vencido o prazo de xustificación sen que a entidade colaboradora da subvención presentase a documentación xustificativa, o Servizo de Promoción de Emprego e Desenvolvemento Local requiriralle que o faga nun prazo improrrogable de quince (15) días. A falta de presentación da documentación neste prazo supoñerá o inicio do correspondente expediente de reintegro ou a perda da subvención e as demais responsabilidades previstas na LXS. O incumprimento por parte das entidades colaboradoras dos requisitos establecidos nestas bases e nas demais normas aplicables, así como as condicións que no seu caso se establezan no correspondente acordo de concesión, dará lugar, total ou parcialmente, logo do oportuno expediente de incumprimento, á cancelación desta e á obriga de reintegrar a achega económica, segundo o establecido nos artigos 28, 29 e 30 da Ordenanza xeral de subvencións da Deputación de Pontevedra. O reintegro levará engadida a esixencia dos xuros de demora correspondentes desde o momento do aboamento da subvención ata a data na que se acorde a procedencia do reintegro. De acordo co artigo 34 da LSG, o xuro de demora aplicable será o xuro legal do diñeiro incrementado nun 25 %, salvo que na Lei de orzamentos xerais do Estado se estableza outro diferente. No referente ás infraccións e sancións administrativas, será de aplicación o previsto no artigo 52 e seguintes da LXS e no artigo 32 da Ordenanza xeral de subvencións da Deputación de Pontevedra. Décimo novena. Protección de datos Os datos persoais obtidos neste procedemento serán obxecto de tratamento pola Deputación de Pontevedra, en calidade de órgano responsable, coa finalidade de xestionalos, verificar os datos e os documentos que a persoa interesada declare na súa solicitude para comprobar a súa exactitude e levar a cabo todas as actuacións administrativas que, no seu caso, deriven. Ademais, os datos persoais obtidos poderanse incluír nunha base de datos coa finalidade de recibir información do Servizo de Promoción de Emprego e Desenvolvemento Local da Deputación de Pontevedra relativa á proposición de perfís profesionais que puidesen ser de interese polo ámbito de actuación das entidades solicitantes. A lexitimación para o tratamento dos datos baséase no cumprimento dunha tarefa de interese público ou no exercicio de poderes públicos segundo as normas de rango legal recollidas no apartado “normativa aplicable”, dispoñible na ficha de procedemento en https://sede.depo.gal , e no consentimento explícito. Os datos persoais obtidos neste procedemento serán obxecto de comunicación ás administracións públicas no exercicio das súas propias competencias ou cando sexa necesario para que a cidadanía poida acceder de forma integral á información relativa a unha materia. As persoas interesadas poderán acceder, rectificar e suprimir os seus datos, exercer outros dereitos ou revogar o consentimento segundo o previsto en https://depo.gal/proteccion-de-datos/exercicio-de-dereitos . Documento asinado dixitalmente na marxe. ANEXO I Criterios de selección O proceso de selección consistirá en valorar os méritos acreditados polas persoas preseleccionadas polo Servizo Público de Emprego e levarase a cabo conforme aos seguintes criterios: a) Expediente académico: ata un máximo de 4 puntos, segundo a nota media calculada para as titulacións universitarias no Real decreto 1125/2003, de 5 de setembro, e para os ciclos de formación profesional no Real decreto 1147/2011, de 29 de xullo, ou no posterior Real decreto 659/2023, de 18 de xullo. En caso de que a media dalgunha das titulacións convocadas non fose calculada polas normas referidas ou esta non se especificase, non se valorará. b) Por ter un doutoramento relacionado co contido do posto: 2 puntos. c) Por cada título oficial de máster universitario ou título propio da universidade de máster relacionado co contido do posto: 0,50 puntos cada un, ata un máximo de 1 punto. d) Por posuír unha titulación académica oficial distinta e relacionada co posto de traballo que se vai desempeñar, de nivel igual ou superior á esixida para formalizar o contrato formativo: 0,50 puntos por título, ata un máximo de 1 punto (neste apartado non se terán en conta as titulacións de nivel inferior que sexan necesarias para obter outras de nivel superior nin as de máster ou doutoramento). e) Por asistir a cursos de especialización, formación e perfeccionamento organizados por centros oficiais dependentes da Administración do Estado, da comunidade autónoma ou da Administración local, universidades, colexios oficiais ou escolas da Administración pública directamente relacionados co posto que se vai desempeñar (incluídos os organizados por sindicatos no marco do Acordo nacional de formación continua): ata un máximo de 2 puntos. Estes computaranse do seguinte xeito: • De máis de 150 horas de duración: 0,30 puntos por curso. • De entre 100 e 150 horas de duración: 0,25 puntos por curso. • De entre 60 e 99 horas de duración: 0,20 puntos por curso. • De entre 30 e 59 horas de duración: 0,15 puntos por curso. • De entre 10 e 29 horas de duración: 0,10 puntos por curso. • Por acreditar o nivel de coñecemento da lingua galega co Celga 3 nos postos de ciclo superior ou medio, ou Celga 4 nos de licenciatura, grao ou diplomatura: 0,50 puntos. Non se terán en conta os certificados ou os diplomas nos que non se especifique a duración do curso en número de horas ou créditos. Tampouco se computarán as xornadas, congresos, seminarios ou cursos de duración inferior a dez horas. O tribunal cualificador poderá requirirlles ás persoas aspirantes que acrediten o recollido na documentación presentada, ademais de cantas precisións estimen oportunas. As persoas candidatas que accedan con titulacións de licenciatura, arquitectura ou enxeñería (títulos pre-Boloña) e teñan un certificado da súa correspondencia co nivel 3 MECES (Marco español de cualificacións para a educación superior) terán unha puntuación de 0,50 puntos, equivalente a un máster universitario. A ligazón á web do Ministerio de Ciencia, Innovación y Universidades, onde se publica o catálogo de titulacións homologadas ao nivel de máster, é o seguinte: https://www.ciencia.gob.es/Universidades/MECES.html Nesta fase só se terán en conta os méritos que se xustifiquen documentalmente no día e na hora que sinale o concello. En caso de empate entre as puntuacións das persoas aspirantes, a orde de prelación determinarase dándolle preferencia á muller naqueles casos nos que se produza unha infrarrepresentación do sexo feminino, nos termos establecidos no artigo 153 da Lei 7/2023, de 30 de novembro, para a igualdade efectiva de mulleres e homes en Galicia. Se o citado precepto non resultase aplicable ou persistise o empate tras a súa aplicación, este resolverase en función da nota media global do expediente académico e, de continuar este, pola puntuación acadada nos seguintes apartados. As puntuacións outorgadas publicaranse na Sede electrónica ou na web do concello xunto coa relación de candidaturas seleccionadas por orde decrecente para cada posto de traballo ofertado, e indicaranse as persoas candidatas seleccionadas e as correspondentes suplentes. As persoas candidatas poderán formular, ante o tribunal cualificador, as alegacións que estimen oportunas no prazo de dous (2) días hábiles, contados a partir do día seguinte ao da súa publicación na Sede electrónica ou na páxina web. Examinadas as alegacións presentadas, o tribunal cualificador publicará a relación definitiva de persoas candidatas, por orde de maior a menor puntuación, coa correspondente proposta de contratación baixo a modalidade de contrato formativo, para cada posto de traballo ofertado. ANEXO II: CERTIFICADO DA SECRETARÍA “+EMPREGA NOS CONCELLOS” 2026