Segunda convocatoria das bases programa máis cultura 2026

ANUNCIO: SEGUNDA CONVOCATORIA DAS BASES PROGRAMA “MÁIS CULTURA” 2026 Por acordo número 24144 adoptado na sesión ordinaria realizada pola Xunta de Goberno Local do Concello de Poio o 8 de setembro de 2026 prestouse aprobación: [..Primeiro: Prestar aprobación á segunda convocatoria das bases do Programa Máis Cultura 2026, mantendo o texto íntegro das Bases aprobadas en Xunta de Goberno Local o 24 de marzo de 2026 e que obran no expediente..] [..Segundo: Ampliar o crédito para a concesión das actuacións que será de 2.500€, e vén complementar as axudas directas recollidas no anexo de subvencións previsto no orzamento 2026. [..Terceiro: Publicar anuncio de aprobación e contido das Bases aprobadas no Boletín Oficial da Provincia de Pontevedra e no taboleiro de anuncios do Concello de Poio, activando o trámite externo formulario normalizado dispoñible na Sede electrónica do Concello de Poio..] Reprodúcese a continuación o texto das bases aprobadas: “BASES REGULADORAS E CONVOCATORIA PARA A SOLICITUDE DE GRUPOS ACOLLIDOS AO PROGRAMA “MÁIS CULTURA” PARA O ANO 2026” O Concello de Poio, a través da área de Cultura, ten entre os seus fins promover e fomentar a cultura popular galega mediante o apoio aos grupos locais de música, teatro e audiovisual acollidos ao Programa “MáisCultura”, financiando actuacións nas festas patronais e naqueles outros eventos populares no termo municipal de Poio, e contribuíndo desta maneira á dinamización cultural no noso municipio. Tamén poderá retribuírse a participación destes grupos naquelas actividades de carácter cultural realizadas no termo municipal de Poio relacionadas con diferentes manifestacións artísticas coma a difusión do patrimonio, actividades cinematográficas, exposicións de artes plásticas ou temas similares que fomenten as políticas culturais locais, e que serán obxecto de valoración por parte da área de Cultura. Deste xeito, a través desta iniciativa o Concello de Poio autorizou durante o ano 2025 máis de 80 actuacións fomentando o acceso das entidades locais ás actuacións no ámbito do folclore e a música tradicional e popular galega. Co impulso outorgado ao programa “MáisCultura”, e co obxectivo de contribuír e ampliar a acción cultural local e outras iniciativas tradicionais da localidade, incorporase novas categorías as existentes: agrupacións de verbena galega; teatro (animación teatral e clown) e outros grupos, no que se inclúen (audiovisuais, baile moderno e poetas,..) que sirvan como base para que as entidades e colectivos organizadores de actos culturais, poidan programar as súas actividades tomando como referencia os grupos e creadoras culturais locais. Nesta liña o programa “MáisCultura” continua coa súa estratexia de difusión cultural e manterá a Axenda Cultural, dispoñible na web do Concello de Poio, coa finalidade de continuar ofrecendo visibilidade e difusión ás actuacións e promovendo a cultura de base. Deste mesmo xeito, o programa pretende incrementar os eidos culturais das actuacións autorizadas cos fondos públicos locais e continuar identificar aqueles elementos mínimos de publicidade institucional para garantir o retorno da axuda e a valoración do impacto a nivel local. En base o anterior, o Concello de Poio promove o Programa “MáisCultura” de apoio á dinamización cultural de agrupacións e asociacións sen fins de animo de lucro, asi como comisións de festas legalmente constituídas na localidade de Poio, a través do cal concederanse actuacións, de grupos do Catalogo de grupos do Concello de Poio, nas actividades culturais realizadas na localidade de Poio durante o ano 2026, de acordo coas seguintes: BASES REGULADORAS E CONVOCATORIA 1.-Obxecto Estas bases teñen por obxecto aprobar a convocatoria 2026 do Programa “MáisCultura” de fomento da cultura popular galega coa participación dos grupos locais acollidos a este programa nas festas patronais ou outras actividades culturais realizadas no termo municipal, asi como regular os criterios de concesión das solicitudes de actuación de grupos a cargo ao programa que se desenvolverán na localidade de Poio. 2.-Financiamento O crédito inicial que se dispón para a concesión das actuacións será de 16.000,00 euros, con cargo á partida orzamentaria 334.489,01 previsto no orzamento 2026. 3.-Entidades destinatarias As entidades solicitantes poderán ser as agrupacións e asociacións sen fins de lucro inscritas no Rexistro Municipal de Asociacións, así como as comisións de festas legalmente constituídas que promovan a realización das festas e/ou actividades sinaladas na base primeira. As entidades interesadas, como organizadoras dos actos, débense poñer en contacto cos grupos inscritos no “Catálogo de grupos” para concretar a data da actuación, coñecer as condicións e facilitarlles a actuación. Os grupos disporán dun escenario ou marco adecuado para que poidan efectuar a súa actuación sen impedimento ningún. 4.-Presentación de solicitudes As solicitudes presentaranse obrigatoriamente por medios electrónicos a través do formulario normalizado dispoñible na Sede electrónica do Concello de Poio https://concellopoio.sedelectronica.gal/info.3 Se algunha das persoas interesadas presenta a súa solicitude de forma presencial, requiriráselle que a emende a través da súa presentación electrónica. Para estes efectos, considerarase como data de presentación da solicitude aquela na que se realice a emenda. Se a solicitude non reúne os requisitos esixidos nestas bases, requiriráselle á entidade interesada para que emende as deficiencias no prazo de dez días hábiles, con indicación expresa de se non o fixese, teráselle por desistido da na súa petición, de acordo co disposto no artigo 68 da Lei 39/2015, do 1 de outubro, de Procedemento Administrativo Común das Administracións Públicas. Cada entidade poderá solicitar ata un máximo de dúas actuacións por festa ou evento de ata dous días de duración e catro actuacións por festa/evento de tres ou máis días de duración (sen exceder o máximo en dous grupos acollidos por día) en cada festa ou evento con programación cultural. A mera presentación da solicitude suporá que a entidade solicitante coñece e acepta as presentes bases. 5.- Documentación Xunto coa solicitude deberase achegar a seguinte documentación: • Publicidade en galego do evento na que figure o logo coa colaboración do Concello de Poio. • Achegarase cartel en formato PDF, JPG ou PNG e, no seu caso, os enlaces á web e aos perfís de redes sociais nos que se fará constar nas súas entradas aos perfís do Concello de Poio: @concellodepoio • Certificados de estar ao corrente coas obrigas tributarias coa Axencia Estatal Tributaria, coa Facenda autonómica e coa Seguridade Social ou declaración xurada pola representante da entidade. • O Concello de Poio comprobará de oficio a inscrición no Rexistro municipal de Asociacións e a non existencia de débedas coa facenda municipal. 6.- Solicitudes excluídas Quedan expresamente excluídas do Programa “MáisCultura”: • As solicitudes efectuadas por persoas particulares, empresas, comunidades de montes, cofradias de pescadores, centros educativos e ANPAS. • Aquelas peticións de grupos que superen os límites establecidos na base 10 desta convocatoria. • Aquelas peticións realizadas por distintas entidades para a mesma festa ou evento. 7.- Prazo para a presentación de solicitudes O prazo de presentación de solicitudes de actuación comezará a partir do día seguinte ao da publicación desta convocatoria no Boletín Oficial da Provincia de Pontevedra (BOPPO). As solicitudes deberán presentarse cunha antelación mínima de 20 días naturais con respecto á data de realización da actuación. As solicitudes presentadas con posterioridade ao prazo mínimo de 20 días naturais previsto no punto anterior serán denegadas. 8.- Notificacións As notificacións practicaranse a través da sede electrónica do Concello de Poio. Estas notificacións entenderanse practicadas no momento no que se produza o acceso ao seu contido e entenderanse rexeitadas cando transcorresen 10 días naturais desde a posta a disposición da notificación sen que se acceda ao seu contido. O sistema remitiralles ás persoas interesadas os avisos da posta á disposición das notificacións á conta de correo electrónico indicada na solicitude. Estes avisos non terán, en ningún caso, efectos de notificación practicada, e a súa falta non impedirá que a notificación sexa considerada plenamente válida. Se o envío da notificación electrónica non fose posible por problemas técnicos, practicarase a notificación polos medios previstos na normativa reguladora do procedemento administrativo común. 9.- Instrución do procedemento O procedemento de concesión de subvencións tramitarase en réxime de concorrencia non competitiva, por esgotamento do crédito, sen necesidade de prelación das actividades ou eventos entre si, de conformidade co disposto nos artigos 19.2 e 22 da Lei 9/2007, do 13 de xuño, de subvencións de Galicia. A instrución do procedemento corresponderalle á concelleira de Cultura, que realizará de oficio cantas actuacións estime necesarias para a determinación, coñecemento e comprobación dos datos achegados polas entidades interesadas. O servizo de Cultura examinará as solicitudes presentadas e ditará a proposta de resolución. A resolución do procedemento realizarase por Decreto da Alcaldía, e será notificada na forma establecida na base 8. 10.- Adxudicación das actuacións A adxudicación das actuacións apostará pola diversificación das categorías na repartición dos fondos e determinarase aplicando os seguintes criterios: • Atenderase as solicitudes que realicen as entidades solicitantes ata un máximo de dúas actuacións por festa ou evento de ata dous días de duración e catro actuacións por festa/evento de tres ou máis días de duración (distribuidoras as actuacións solicitadas en cada un dos días de duración con un máximo dúas actuacións por día de programación cultural) como indica a base 4) da festa ou evento. • Dúas entidades distintas non poderán presentar solicitudes de actuación para a mesma festa ou evento. • O importe máximo das actuacións autorizadas ás entidades solicitantes para cada festa ou evento será de 480,00 € para eventos de ata dous días de duracións e de 960,00€ para eventos de 3 ou máis días de duración. • Para a súa concesión é preciso que acompañen a correspondente difusión publicitaria do evento para o que se solicita a actuación, de acordo co disposto na base 5. • As solicitudes serán aceptadas, no caso de cumprir todos os requisitos establecidos nas presentes bases, segundo a orde de entrada das mesmas. En calquera caso, a concesión das actuacións queda suxeita á dispoñibilidade orzamentaria. 11.- Pagamento O pagamento das actuacións autorizadas con cargo a este programa efectuaráselle directamente ás agrupacións musicais, que deberán emitir a correspondente factura ao Concello de Poio, facendo constar na descrición o nome da festa/actividade e a mención ao Programa “MáisCultura” 2026. Así mesmo xuntarán á factura o certificado acreditativo da realización da actuación, debidamente asinado polo representante da asociación ou comisión de festas a que lle foi concedida a mesma. O pago realizarase unha vez presentado o certificado acreditativo da actuación e recibida a correspondente factura, que deberá presentarse, no prazo máximo de 30 días naturais contados dende a data da realización da actuación e, en todo caso, antes da finalización do ano en curso. En consecuencia, o Concello de Poio retribuirá cada actuación autorizada con cargo ao Programa “MáisCultura” cos seguintes importes (IVE engadido), independentemente de que os grupos teñan un caché superior: • Agrupacións folclóricas (actuación en procesións, misas e concertos): 240,00 €. • Pandeireteiras: 210,00 €. • Corais: 240,00 €. • Música popular instrumental (charangas, batucada, acordeóns, grupos de guitarra..): 240,00 €. • Música popular (solistas): 150,00 €. • Agrupacións verbena galega: 240,00 €. • Teatro (animación teatral e clown): 240,00 €. • Outros grupos (audiovisuais, baile moderno, poetas,..): 150,00 €. 12.- Obrigas das entidades beneficiarias As entidades interesadas ás que se lles autoricen actuacións, como organizadoras dos actos con cargo ao Programa “MáisCultura”, están obrigadas a: • Poñerse en contacto cos grupos acollidos a este Programa “MáisCultura” concretar a data da actuación, coñecer as condicións e facilitarlles o concerto nun marco adecuado para que poidan efectuar a súa actuación sen impedimento ningún. • Non se subvencionarán solicitudes que exclúan a lingua galega como lingua de uso vehicular dos soportes divulgativos das actividades (web, redes sociais, cartelaría, folletos e equivalentes). Por tanto, todas as actividades subvencionadas deberán realizarse en lingua galega, sen prexuízo de que tamén poidan incluír outras linguas. Desde o Concello de Poio farase seguimento específico para comprobar o cumprimento desta obriga. • Informar e anunciar que a actividade está financiada polo Concello de Poio. Deberá figurar a colaboración do Concello de Poio en todos os elementos de difusión relacionados coa actividade subvencionada. • Na difusión das actividades subvencionadas en redes sociais, deberán incluír ou etiquetar nas súas entradas aos perfís do Concello de Poio: @concellodepoio • Utilizar, con carácter xeral, a transversalidade de xénero a través do emprego dunha linguaxe non sexista e inclusiva, elaborar materiais que fomenten a igualdade, tratar as imaxes con valores de igualdade, presenza equilibrada, diversidade, pluralidade de roles e identidades de xénero. • Obter todas as autorizacións e permisos necesarios para o bo desenvolvemento da actuación. • Aboar as taxas da SGAE, cando corresponda. • Notificar os cambios que se puidesen producir, e no caso de que a actuación non se levase a cabo tamén poñelo en coñecemento deste Concello. No caso, de alterar as datas de actuación con respecto a cartelaría presentada para a festa/evento, a difusión en redes sociais ou outros medios a solicitude de actuación non será subvencionable. • Emitir un certificado acreditativo de que o grupo realizou a actuación para poder proceder ao pago da factura correspondente (segundo o modelo dispoñible na sede electrónica do Concello de Poio). 13.- Vixencia As solicitudes de actuacións con cargo a este Programa “MáisCultura” terán vixencia durante todo o ano 2026 e estarán condicionadas á existencia de consignación orzamentaria. 14.- Órgano de aprobación O órgano competente para a aprobación destas bases é a Xunta de Goberno Local. 15.- Publicidade da convocatoria Estas bases reguladoras publicaranse no BOPPO e na Sede electrónica do Concello de Poio https://concellopoio.sedelectronica.gal/info.6 16.- Tratamento de datos de carácter persoal En cumprimento co establecido na actual normativa de Protección de Datos de Carácter Persoal, os datos persoais recadados neste procedemento serán tratados na súa condición de responsable polo Concello de Poio, coas finalidades de levar a cabo a tramitación administrativa que se derive da xestión deste procedemento. As persoas interesadas poderán acceder, rectificar e suprimir os seus datos, así como exercer outros dereitos, tal e como se explica na información adicional sobre Protección de Datos na páxina web do Concello de Poio na seguinte ligazón http://www.concellopoio.gal/index.php/ política de privacidade. 17.- Disposición final O Concello de Poio quedará exento de calquera responsabilidade civil, mercantil, laboral ou calquera outra derivada das actuacións ás que están obrigadas as entidades destinatarias das autorizacións realizadas con cargo a este Programa “MáisCultura”. A presentación de solicitude de actuacións leva implícita a autorización ao Concello de Poio para que publique na súa páxina web e no taboleiro de anuncios da sede electrónica do Concello de Poio a relación de actuacións financiadas con cargo a este Programa “MaisCultura”, coas excepcións previstas nas Leis. Estas Bases entrarán en vigor ao día seguinte da súa publicación integra no Boletín Oficial da Provincia. 18.- ANEXOS